കഥപറഞ്ഞിരിക്കുന്നതിന്നിടയിൽ
ഒരാൾ വാക്കുകളെ അഴിച്ചെടുത്ത്
കടന്നു കളഞ്ഞാലോ...
കാണെക്കാണെ കൺമുന്നിൽ
നിന്നും കാണാതായാലോ...
രസച്ചരട് പൊട്ടിയ
കഥകൾ എവിടെക്കാവും
പറന്നു പോവുന്നത്...
ഏത് ആകാശമാവും
അവയ്ക്ക് അഭയമാവുന്നത്..?
അല്ലെങ്കിലും
മുറിഞ്ഞു പോയിടത്ത് തന്നെ
മുളപൊട്ടിയുയരുമെന്നോർത്ത്
ഏത് കഥയാണ്
കേൾവിക്കാരനെ
കാത്തിരിക്കാറുള്ളത്...?
മനസ്സിലുടക്കിയ നൂലിഴ
കഥയോട് ചേർത്ത് കെട്ടാൻ
ഏത് ചെവിയാണ് മടങ്ങി വരാറുള്ളത്...?
No comments:
Post a Comment