ചിലപ്പോൾ,

ഒരൊറ്റ സ്ട്രോക്കിൽ തീർത്ത

ചിത്രം പോലെ

ചില ഒഴുക്കൻ മറുപടികൾ...

മറ്റു ചിലപ്പോൾ,

അരക്കിറുക്കുകളുടെ

കടും നിറങ്ങൾ കൊണ്ട്

വരയ്ക്കുന്ന 

അതി മനോഹരമായ

വർത്തമാനങ്ങൾ....

എന്തായാലെന്താ...

നമുക്ക് മിണ്ടാൻ

കാരണങ്ങൾ

ഇപ്പോഴുമുണ്ടെന്നുള്ളതാണ്

സന്തോഷം...

ആശ്വാസവും....

 പനിയെന്നത്,

മഴയെന്ന

പോലെ 

എന്തൊരു

തണുത്ത 

വാക്കാണ്....

പക്ഷെ,

ജ്വരം എന്ന്

പറയുമ്പോൾ

ഒന്ന് പൊള്ളും..

ഊഷ്മാവതിന്റെ

പരകോടിയിൽ

നിൽക്കുന്നത് പോലെ

തോന്നും...

 പിണങ്ങുക എന്നത്

അത്രയേറെ 

മാനസികാധ്വാനം വേണ്ട

ഒരു ജോലിയാണെങ്കിൽ

പിണക്കമഭിനയിക്കുകയെന്നത്

വല്ലാത്തൊരു 

ഞാണിൻമേൽ കളിയാണ്..

ഹൊ..

ഒരു ചിരിയൊന്നു

പാളിയാൽ പോരേ

പിടിവിടാൻ...

ഒരു നിമിഷം കൊണ്ട് 

എല്ലാമവസാനിക്കാൻ...

 പാവം ചെടികൾ...

വേരുകളുടെ നഗ്നത

മൂടിവെക്കാനൊരു

മൺതരി പോലുമില്ലാതെ...

സുതാര്യമായ 

സ്ഫടികക്കുപ്പികളിൽ

സ്വീകരണമുറിയുടെ

ഒത്ത നടുക്ക് 

ഇങ്ങനെ പച്ചക്ക്...

 5th September 2021സിറാജ് പ്രതിവാരത്തിൽ