വാ നമുക്ക്
വസന്തങ്ങൾക്ക് വീടൊരുക്കാം..
വിരിയാനിരിക്കുന്ന
ഓരോ പൂക്കൾക്കും
ഓരോ നിറം പറഞ്ഞു വയ്ക്കാം..
നീലയും ചുവപ്പും നിന്റേത്..
വെള്ളയും, മഞ്ഞയും എന്റേത്..
പിന്നെ പർപ്പിളും, പിങ്കും
വയലറ്റും, ഇളം പച്ചയുമെല്ലാം
നിനക്കുമെനിക്കും പ്രിയപ്പെട്ടതാകയാൽ
അത് നമുക്ക്
പങ്കിട്ടെടുക്കാം...
ശലഭായനങ്ങൾക്കായി
ഒരിടവഴി ഒരുക്കിയിടാം..
അതിന്നിടത് വശം
നിനക്ക്.. വലതെനിക്കും..
നിന്റെയിടത്ത്
ശംഖു പുഷ്പവും
പനിനീരും, ചെമ്പരത്തിയും..
എന്റെയിടത്ത്
നന്ദ്യാർ വട്ടവും, പാരിജാതവും
ജമന്തിയും,സൂര്യകാന്തിപ്പൂവും..
ഹാ
പിന്നെയൊരു കാര്യം,
വസന്തങ്ങളുടെ
വീട്ടിലിരിക്കുമ്പോൾ
ഒരിക്കൽ പോലും
നീ വേനലിനെ കുറിച്ചു
മിണ്ടിപ്പോവരുത്...
പൊഴിഞ്ഞു വീഴുന്ന
പൂക്കളെ കുറിച്ചും...
മനസ്സിലായോ..
No comments:
Post a Comment