ആ ദിവസങ്ങളിൽ
മുറിവേറ്റ കുഞ്ഞിനെ പോലെ
മനസ്സിരുന്നു
ചിണുങ്ങാൻ തുടങ്ങും...
വെറുതെ വാശിയെടുത്തു
കരയുകയും
അടുത്ത് ചെല്ലുമ്പോൾ
ആട്ടിപ്പായിക്കുകയും ചെയ്യും..
കണ്ടതൊക്കെ
തച്ചുടക്കുമെന്ന്
ഭീഷണി മുഴക്കും...
ഏത് നിമിഷവും
പൊട്ടിത്തെറിച്ചേക്കാവുന്ന
ഒരഗ്നി പർവതം കണക്കെ
വന്യമായി മുരണ്ടുകൊണ്ടിരിക്കും...
അരക്കെട്ടിൽ ചുറ്റിപ്പിടിച്ച്
അലറിക്കരയും...
ചിലപ്പോൾ
തോന്നും,
ഈ പിടിവാശിക്കുട്ടി
തന്നെയാണ്
ഉദരഭിത്തിയിൽ ആഞ്ഞു തൊഴിക്കുന്നതെന്നും
ഉള്ളിൽ മുറിവേൽപ്പിക്കുന്നതെന്നും
ഉടലാകെ നോവിച്ചു കൊണ്ടൊരു
ചോരപ്പുഴ തന്നെ
ഒഴുക്കുന്നതെന്നും...
No comments:
Post a Comment