അടുക്കളയിൽ ഒറ്റയ്ക്ക് വേവുന്ന
പെണ്ണിനെ കുറിച്ചോർത്തിട്ടുണ്ടോ...
ആരവയറു പോലുംഉണ്ണാതെ
ആവോളമൂട്ടാൻ
കനലൂതി തളരുന്ന പെണ്ണിനെക്കുറിച്ച്..
വറുത്തിട്ടും, പൊരിച്ചിട്ടും
തീൻ മേശ നിറഞ്ഞിട്ടും
മനസ്സ് നിറയുവോളം
വച്ചുണ്ടാക്കുന്ന
ഒരുവളെ കുറിച്ച്...
വീടകങ്ങളിലെ കളിചിരികളിലേക്ക്
രുചിമണം പരക്കുമ്പോഴെങ്കിലും
ഓർത്തു നോക്കിയിട്ടുണ്ടോ..
വീടൊരുക്കിയും
വിഭവങ്ങളൊരുക്കിയും
സ്വയമൊരുങ്ങാൻ
മറന്നു പോയവളെ കുറിച്ച്...
രാവുറങ്ങാതെ തളർന്ന
അവളുടെ കണ്ണുകളെ കുറിച്ച്...
ഓരോ ആഘോഷങ്ങളുടെയും
രുചിയോർമ്മകൾക്ക് പുറകിലും
പാത്രങ്ങളുടെ
കലപിലയൊച്ചകൾക്കിടയിൽ
കേൾക്കാതെ പോയ
അവളുടെ ശബ്ദങ്ങളെ കുറിച്ച്....
No comments:
Post a Comment