പ്രണയത്തിലായിരിക്കുമ്പോഴാണോ
നമ്മൾ
മഴനേരങ്ങളെ ഇത്രമേലാസ്വദിക്കുന്നത്.
മനസ്സിന്റെ ചില്ലകളിൽ
മഴനാരുകൾ കൊണ്ട്
കൂടൊരുക്കുന്നത്...
മഴ നനഞ്ഞ പക്ഷികളെ പോലെ
അതിലേക്ക് ചേക്കേറുന്നത്...
മെല്ലെ ചിറകുകുടഞ്ഞ്
മഴയൊച്ചകൾക്ക്
താളം പിടിക്കുന്നത്...
മണ്ണിന്റെ മനസ്സിലേക്ക്
മഴയെന്നപോലെ
അത്രയും ആർദ്രമായി
ഓർമ്മകളിലേക്കൊഴുകിയിറങ്ങുന്നത്..
അതിൽ മഴവിരലുകളാൽ
ഒരാളുടെ മുഖം വരച്ചിടുന്നത്..
മഴ മടങ്ങിയാലും
മരങ്ങൾ പെയ്യുമെന്ന്
അടക്കം പറഞ്ഞ
അയാൾക്ക് വേണ്ടി മാത്രം
അതിലൊരു
ഒറ്റത്തൂവൽ
അടയാളം വക്കുന്നത്....
No comments:
Post a Comment