വസന്തങ്ങളുടെ കാവൽക്കാരൻ

ഋതുക്കളുടെ ദേവാ...
അവനുറങ്ങിയുണരും മുൻപേ
ഭൂമിയിൽ വസന്തം വരച്ചിടുക
ഇന്നോളം
ലോകം കണ്ടിട്ടില്ലാത്ത
നിറങ്ങളാൽ
ഓരോ പൂവിനേയും
അലങ്കരിക്കുക
കാറ്റിന്റെ ഓരോ ചലനങ്ങളിലും
ശലഭങ്ങളുടെ ചിറകടിയിലും
സിരകളിലേക്ക്
പടർന്നു കയറുന്ന സുഗന്ധം
അവയിലോരോന്നിലും നിറക്കുക
വേനലിന്റ
വെയിൽച്ചീളുകൾ കൊണ്ട്
മുറിവേറ്റ മനസ്സിനെ
പൂവിതളുകളാൽ മൂടി വയ്ക്കുക..
സ്നേഹത്തിന്റെ തേൻ പുരട്ടുക...
എന്നിട്ട്,
പിറക്കാതെ പോയ
ഓരോ വസന്തങ്ങളെയും
വാക്കാൽ വരച്ചിട്ട
അയാൾക്ക് മാത്രമായി
നിന്റെ പൂന്തോട്ടങ്ങളുടെ
ഔസ്യത്തെഴുതി വയ്ക്കുക.