ഡൽഹി സ്കെച്ചസ് മാഗസിൻ 2019ഒക്ടോബർ ലക്കത്തിൽ പ്രസിദ്ധീകരിച്ചത്

അത്രയും ചെറിയ മരണങ്ങൾ

ആര് ആരിൽ ഭ്രാന്താരോപിച്ചാലും
മനസ്സിൻ മേലുള്ള പിടിമുറുക്കം
കുറഞ്ഞു വരുന്നതുപോലെ...
ഉറക്കം കളഞ്ഞു പോയ
മൂന്ന് രാത്രികൾക്ക് ശേഷം
സ്വപ്നങ്ങളെ ശരീരത്തിൽ നിന്നും
സ്വതന്ത്രമാക്കി
ഒട്ടും ഭാരമില്ലാത്തൊരു ദേഹം
തളർന്നുറങ്ങുന്നത് പോലെ...
ഉച്ചിയിലുദിച്ച സൂര്യൻ
പെരുവിരലിലൂടെയിറങ്ങിപ്പോയതും
രാവിൻ കരിമ്പടം തലവഴിമൂടി
മണിക്കൂറുകൾ ഈയിരുട്ടിലൂടെ
പാഞ്ഞു പോയതും
ഒന്നുമറിയാതെ ഒരുറക്കം...
വെക്കലും, വിളമ്പലും 
ഒരുക്കലും, ഒരുങ്ങലും,
യാത്രകളും, യാത്രയയപ്പുകളും....
വീട് അതിന്റ ജോലികൾ
തുടരുന്നുണ്ട്...
തലക്കെട്ടുകൾക്കു
താഴെ വായിക്കാനാളില്ലാതെ
വാർത്തകൾ
ഒരു ചൂട് ചായക്കരികിൽ
ഇരുന്ന് മയങ്ങുന്നുണ്ട്...
മുറ്റത്ത് കരിയിലകൾക്ക് മേലേ
ചൂലിഴയുന്ന ശബ്ദം...
അതിനി മെല്ലെ മെല്ലെ
ഈ മുറിയിലും എത്തും.
എന്റെയുറക്കത്തിനെ
തെല്ലും അലോരസപ്പെടുത്താതെ
ഈ കട്ടിലിന്നടിയിലൂടെ
ഇഴഞ്ഞു നീങ്ങും...
ഓരോ മുറികളുടെയും
മുക്കിലും മൂലയിലും
ഫണം വിരിച്ചാടി
വന്ന വഴിയേ തിരികെ പോവും...
തണുത്ത ചായമേൽ
കെട്ടിക്കിടക്കുന്ന പാടനീക്കി
ഇത്തിരി കൂടി തെളിച്ചമുള്ള
വായനക്കായി
വെയിലിത്തിരി ചാഞ്ഞിരിക്കും...
മനസ്സഴിച്ചു വച്ചാൽ
ഒരു ദേഹമെത്രകണ്ട്‌
സ്വതന്ത്രമാവുമോ
അത്രയും വിശാലമായി
ഒരാത്മാവ് മാത്രം
ഉറക്കം തുടർന്ന് കൊണ്ടിരിക്കും...
സ്വപ്നങ്ങളില്ലാതെ...

ഒറ്റക്കല്ലെന്ന തോന്നലിൽ
ഒപ്പമുണ്ടെന്ന കരുതലിൽ
ഒന്നാണെന്ന  ഒരു വാക്കിൽ
ഒരാൾ..
ഒരു നിഴൽക്കൂട്ട് !

ആത്മവിചാരണകളിൽ,
നോവടയാളങ്ങൾ പോലെ
ചിലയോർമ്മകളിപ്പോഴും
നീലിച്ചു കിടപ്പുണ്ടോ?
ഒറ്റക്കിരിക്കുമ്പോഴൊക്കെയും
ഒരേറ്റുപറച്ചിലിന്റെ ഭാഷയിൽ
മനസ്സ് മിണ്ടാറുണ്ടോ?

നിശബ്ദതയുടെ നെഞ്ചിൽ
പറ്റിച്ചേർന്നു കിടന്ന്
ഹൃദയമിടിപ്പുകൾക്ക്
കാതോർക്കുകയാണ്...
ഒരു വാക്ക് പോലും
മൊഴിമാറ്റം ചെയ്യാതെ,
സ്നേഹത്തിന്റെ കുറുകലുകളെ
വെറുതെ വായിച്ചെടുക്കുകയാണ്...

പടരുന്നതിലേക്കൊക്കെ
പച്ച നിറം
പകരുന്ന
പായൽ ജീവിതങ്ങൾ...
അതിജീവനത്തെ കുറിച്ച്
അവർക്കറിയില്ല.
ഒഴുകാതെ... വളരാതെ...
തിരസ്കരിക്കപ്പെട്ട
ഏതോ ശിലകളിൽ
പറ്റിപ്പിടിച്ച്...
ഒറ്റനോട്ടത്തിൽ ,
നിറമുള്ള ജീവിതം..

നീ പിന്നെയും
കടലിനെ കുറിച്ച്
കഥ പറയുന്നു..
അവളോ
കാണാമറയത്തിരുന്ന്
കവിതയെഴുതുന്നു...
തിരകൾക്ക് കുറുകെ
വാക്കുകൾ
കോർത്ത് കെട്ടുന്നു...
ഒരൊറ്റ വരികൊണ്ട്
ഒരു കടൽ
മുറിച്ചു കടക്കുന്നു.... 

തടവറകളല്ല,
അകം ചുമരുകൾ
അതിരുകളായ ഒരു ലോകം...
അടർന്നു വീഴാറായ ഒരാകാശവും
പൊഴിയാൻ തുടങ്ങുന്ന
മേഘങ്ങളും
മേൽക്കൂരയായൊരു ലോകം...