നീ വരുമ്പോൾ

ഇപ്പോൾ നീ ചോദ്യങ്ങൾക്ക്
അരം കൂട്ടുകയാവും..
മറുപടികളിലെ
മുറിവുകളിൽ  പുരട്ടാൻ
നീറുന്ന കാരണങ്ങൾ
കണ്ടുപിടിക്കുകയാവും...
എന്റെ യുക്തിക്ക് വഴങ്ങാത്ത
നൂറ്‌ കഥകളെ
എഴുതി തിട്ടപ്പെടുത്തുകയാവും...
ചങ്കിടിപ്പുകൾ
ഒരു നിമിഷത്തേക്കെങ്കിലും
നിലച്ചു പോകാൻ പോലുന്ന
നോട്ടങ്ങളെ
കണ്ണിൽ തിരുകി വക്കുകയാവും...
എന്റെ മറുപടികളെ
ചുണ്ടിൽ തന്നെ തുന്നി വെക്കാനായി
ഉമ്മകളെ കോർത്തെടുക്കുകയാവും...
ഒരു നീണ്ട മൗനത്തിലേക്കെന്നെ
പൊതിഞ്ഞു വെക്കാനായി
നിന്റെ നിഴൽപ്പുതപ്പും
കയ്യിൽ കരുതുന്നുണ്ടാവും...
നല്ല നാളെകൾ എന്ന്
എഴുതിപ്പിടിപ്പിച്ച
ഒരു കൈലേസും...