Friday 15 May 2015

അകലങ്ങളിലേക്ക്

നമുക്കിനി     
മുഖമില്ലാത്തവരെപ്പോലെ നടക്കാം...
തിരിച്ചറിയാനാവാത്ത വണ്ണം
വാക്കുകളിൽ മായം ചേർക്കാം...

അടുക്കാനനുവദിക്കാതെ,മനസ്സിനെ
അകലം കൊണ്ടളക്കാം..
കനലെരിയുന്ന നെഞ്ചിലീ
കിനാവുകൾക്ക് ചിതയൊരുക്കാം..

ഒറ്റവരിയിലെ യാത്രാമൊഴിയിൽ
ഓർമ്മകളെ കൊരുത്തിടാം...
സ്വപ്നങ്ങളോരോന്നായഴിച്ചു വച്ച്
നിന്നിൽ നിന്നെന്നെ സ്വതന്ത്രയാക്കാം...

മറവിയുടെ ആഴങ്ങളിലൊളിച്ചിരുന്ന്
കരയാൻ പഠിക്കാം...
ഉന്മാദത്തിന്റെ അനന്തതയിലേക്ക്
സ്വയമിറങ്ങിപ്പോകാം...

പ്രണയത്തിന്റെ കുഴിമാടത്തിലേക്ക്
അവസാന മണ്ണും കുടഞ്ഞെറിഞ്ഞ്‌
നമുക്കകലങ്ങളിലേക്ക് മറയാം...
വെറുതെയെങ്കിലും,
പരസ്പരം കാതോർക്കാം

ഇനി ,
ഉഴുതുമറിച്ച   മനസ്സിന്റെ വയലുകളിൽ
പുതു സ്വപ്‌നങ്ങൾ തലനീട്ടും വരെ
ഓർമ്മകൾക്കു കുറുകെ
ഋതുക്കൾ കയറിയിറങ്ങട്ടെ...



1 comment:

പിന്നെ,

 1. 'പിന്നെ'യെന്നത് ഒരു മുറിവരയാണ്. അറ്റവും തലയുമില്ലാതെ പോകുന്ന  വർത്തമാനങ്ങളെ കൂട്ടി വായിക്കാൻ ഒരടയാളം വയ്ക്കലാണ് 2. 'പിന്നെ&#...